意大利冬長夏短，凍到鼻哥都甩嘅冬天終於過去，踏入初春，凡係有腳嘅動物都唔再黐住個火爐，周圍搞屎棍，包括未來99屋企兩隻由朝嘈到晚嘅八厭星同意佬個2歲外甥女。
冇嘢嘅，貓咪同小朋友玩人之常情。不過佢哋3個一時糖黐豆一時水溝油，咁複雜嘅三角關係我哋啲旁人係唔會明。
每星期交換一次意大利阿根廷兩地情報，未來99報告，B女剛收到新玩具好開心喔！拆拆拆，攞哂大盒裡面嘅玩具出嚟，然後一二三3條友一齊跳入個箱裏面玩發泡膠波波池。點知呢隻大灰塵星又賴嘢，一個完美翻騰半圈配合一個屈尾抓，出事啦，有人玉脾流血，嗚嗚...
結果灰塵星俾人的咗出嚟訓話一輪，就死死氣去面壁思過。唔好睇少呢招，佢一沉澱起上嚟，可進入無我境界足足半個鐘！可能係佢下半身脂肪都好沉澱有關。
有時見到動物仔都識得自我檢討，反而人大大吓一味衝衝衝，冇乜俾機會自己靜下來，停一停諗一諗，究竟呢個星期係咪姨媽到對隔離嗰個態度差咗啲？份工屎做爛做都做唔完究竟係咪真的啱自己？做人就係咁嫁啦，撞板賴嘢總會有，錯咗學精啲下次咪唔樣衰囉。唔小心惡死能登一句車埋去，咪走去攬一攬咮一啖say sorry就冇嘢啦。
#下半身沉澱
#italyinspring
#停一停諗一諗
Search